29 de agosto de 2016

XV. TXISTULARI ALARDEA URRETXUN

Dagoeneko, Santa Anastasia festetara begira jarrita gaude Urretxuko Txistulari Taldekook. Urtero bezala, parte hartze handia izaten dugu txistulariok festetan: txupinazoan, Txistulari Alardean, Euskal Jai egunean, ... Aurtengoa gainera berezia izango da guretzat, izan ere, Txistulari Alardearen 25. urteurrena ospatuko dugu.

Irailaren 17an, larunbata izango da aurtengo kontzertua, gaueko 23:00etan Iparagirre plazan (eguraldi txarra eginez gero, Aldiri Kiroldegira joango gara). Aurtengo kontzertuaren programa hauxe izango da:
  • Martxa Heraldikoak (M. Glez. BASTIDA)
  • Gurea da (S. SALABERRI )
  • Baietz (J.I. ANSORENA)
  • Algaraz (J.I. ANSORENA)
  • Martxa baten lehen notak (M. LABOA / Mold. J.I. Ansorena)
  • Habanera (X. LETE / Mold. J. Astiazaran)
  • Baldorba (B. LERTXUNDI / Mold. A. Azpiazu)
  • Muskerraren baltsa (K. JUNKERA / Mold. X. Zabala)
  • Askoz gertuago (G. OJANGUREN / Mold. X. Barriola)
  • Udako egunak (A. GOZATEGI / Mold. X. Zabala)
  • Musikatu bizitza (G. ZABALETA / Mold. J. Castillejo)
  • Sagarra jo (KALAKAN / Mold: J. Ituarte)
  • Gernikako Arbola (J.M. IPARRAGIRRE)
Gurekin batera data borobil hau ospatu nahi baduzu, urretxukotxistulariak@gmail.com helbidera idatziz jarri zaitezkete harremanetan. Jarraian dagoen loturan kontzertuko partitura guztiak aurki ditzakezu:

2016ko ALARDEKO PARTITURAK


5 de junio de 2016

Urretxu eta Zumarragako txistulariak, elkarrekin, erabakitze eskubidearen festan


Ekainaren 5 honetan, beste askotan bezala, txistularioi egokitu zaigu Urretxu eta Zumarragako herriak esnatzea. Baina oraingoan, Gure Esku Dago ekimenak antolatutako herri galdeketarekin bat eginez, Lizarriturri eta Antxinako Ama taldeetako txistulariok, denok elkarrekin, kalejira bakarra egin dugu bi herriotako kaleetan zehar.



 
 

12 de febrero de 2016

2016ko inauterietako argazki eta bideoak

2016ko inauterietan ere kalean izan ziren Urretxuko Txistulariak. Otsailaren 7an, goizeko 9etan kalejira egin zuten. Ohetik jeiki eta zuzenean, jantzi eta txukundu gabe, atera ziren, Tolosako Dianan egin ohi duten bezala.

Hemen bideo eta argazkiak!





Orain Garizuma etorri da, beraz, ohiturari jarraituz, Aste Santutako igandea arte ez da kalejirarik izango. Ongi etorri neguko oporrak!

17 de enero de 2016

Danborrero txikiak San Sebastianetako kalejiran

San Sebastian eguna hurrengo asteazkenean izango dugu eta aspaldiko ohitura da egun horren bueltako igandeetako batean, txistularion kalejiran, danbor soinuak Urretxuko kaleetan entzutea. Aurten berriz ekin diogu ohitura horri, baina oraingoan 16 danborrero txiki izan ditugu lagun.

Jon, Maria, Bidatz, Erlantz, Itsaso, Ibai, Ekhi, Mattin, Irati, Maialen, Sara, Peru, Ane, Maddi, Joanes eta Eneritz txistulariokin batera danborra jotzera animatu zaizkigu; denak txistularion seme-alaba, iloba, biloba edo gertukoak. Gradu bakar bat markatzen zuten herriko hainbat termometrok eta, eskimalak bezala jantzita, goizeko 9etarako prest zeuden guztiak danborrak hartuta.



Astean zehar, Diana, Donostiako Martxa, Idiarena eta Tatiago ondo entseatu dituzte kalejiran irteteko ilusioarekin eta, gaur, ordu betetik gorako jarduna egin dute "handiekin batera", Unai Izagirre danbor nagusiak ematen zizkien aginduei jarraituz. Haiekin batera Lizarriturri taldeko dozena bat txistulari eta danborrero bildu gara, guztira talde polita osatuz.

Lizarriturri taldekoon kalejira berezi honek laster izan du oihartzuna sare sozialetan ere. Argazkiak eta bideoak berehala hasi dira mugitzen Whatsapp-eko taldeetan eta Facebooken. Edozein igandetan baino herritar gehiago irten dira gaur leiho eta balkoietara, eta kalean ere bat baino gehiago aritu dira argazkiak ateratzen eta bideoak grabatzen. Horietako batzuk dira hemen ikusi ditzakezuenak.



Urtero bezala, goizeko lanak amaitu ondoren etorri da onena: txokolatea eta txurroak Etxe-Azpi elkartean. Gaur goizean egiten zuen hotzarekin, primerako saria izan da hori parte hartu dugun txiki zein handientzat. Hurrengo urtean berriz!!







23 de noviembre de 2015

Musikarien eguna ospatuz

 
Asteburua hotza eta euritsua izan da Urretxun eta Zumarragan baina ez diogu, horregatik, Santa Zezilia ospatzeari utzi. Larunbatean, azaroaren 21ean, eta igandean, Santa Zezilia egunean, bietan ospatu genuen musikarien patroiaren eguna.
 
Larunbat arratsaldean, Zumarragako Antxinako Ama txistulari taldeko kideekin batera kalejira egin genuen bi herrietako hainbat kaleetan zehar. Gurekin batera etorri ziren Goiargi abesbatzako kideak ere, euren kantuak kalez kale zabalduz.
 
Hemengo bideo hau da kalejira horren adibide. Urretxuko Jose Mari Lasa plazan amaitu genuen arratsaldeko jarduna, Jose Mari Lasa izeneko pieza jotzen.
 

Eta igandean, aje edo bixamonei aurre eginez, kalejira egin genuen berriz ere 12:00etan hasita.

4 de agosto de 2015

Urretxuko Txistulari Alardea

Urtero bezala, udararen hasierarekin batera, Urretxuko Santa Ana festak antolatzen hasten gara herrian eta horien barnean, guretzat urteroko derrigorrezko hitzordua, gure Txistulari Alardea alegia.

Aurtengo kontzertua Irailaren 19an, larunbata izango da. Gaueko 23:00etan Iparragirre plazan (eguraldi txarra eginez gero, Aldiri Kiroldegira mugituko ginateke). Gorobel metal boskotea, Goiargi Abesbatza, Lurra eta Irrintzi Dantza taldeak eta herriko beste hainbat musikari izango ditugu gurekin batera taula gainean.

Hauxe da aurtengo kontzerturako prestatu dugun programa:
  • Sarrera (Gu ta Gutarrak/Mold. Xabier Barriola)
  • Txantxiku (Demetrio Iriarte/Mold. Xabin Bikandi)
  • Han urrun etxe poxpola (Emile Jaques Dalcroze/Mold. J.I. Ansorena)
  • Euskaldunak gara! (Pepe Yanci/Mold. Xabier Zabala)
  • Atabala ta txistua (Jose Luis Ansorena)
  • Fandangoa (Edurne Iturbe/Mold. Xabier Barriola)
  • Arin arina (Edurne Iturbe/Mold. Xabier Barriola)
  • Suletinoa (Herrikoia/Mold. Jesus Castillejo)
  • Urbasa (Roberto Lopez)
  • Elciego (Herrikoia/Mold. Kepa de Miguel)
  • Mozkorri (Oskorri/Mold. Mikel Peñagarikano)
  • Mexikon lo ez (Egan/Mold. Xanet Arozena)
  • Behin batian Loiolan (John Denver/Mold. Egan - Aitor Arozena)
  • Gernikako Arbola (J. M. Iparragirre)
Jarraian aurkitzen den estekan kontzertuan joko ditugun partiturak eskuratu ditzakezu. Bertan parte hartu nahi baduzu, jarri gurekin harremanetan urretxukotxistulariak@gmail.com email helbidearen bitartez. 

27 de enero de 2015

Txistulari Alardea Idiazabalen

Larunbatean, urtarrilaren 24an, Txistulari Alardea ospatu zen Idiazabalen. Urtero antolatzen dute bertako txistulari taldeak San Blas festen atarian kontzertua eta gustora hurbiltzen gara Urretxuko txistulariok bertara. 

Azken urteotan bezala, kontzertua hasi aurretik Idiazabalgo txistulari ohiak kalejira txiki bat egin eta kanturako abesti batzuk jo zituzten kiroldegia girotu asmoz. Beraien saioa amaitutakoan, kontzertuari hasiera eman zitzaion. Beste behin, Iñaki Telleria aritu zen zuzendari lanetan eta bederatzi piezez osatutako kontzertua entzuteko aukera izan zen. Abesti ezagunak osatu zuten kontzertua: Hirugarren Kalez Kale, Ixil-ixilik, Zin Hitz (Juramento), Erribera, Udazken Koloretan, Amaia Operaren Ezpatadantza, Txatxamatxalinatxu, Besamotza. Ohiturak jarraituz, Pablo Sorozabalen Gernika eta Naxario Telleriak idatzitako Idiazabaldarren Danborrada doinuak ere ezin falta programan eta Naxario berak zuzendu zituen bi doinu hauek.

Abesti ezagunak izan arren, moldaketa berriak izan ziren entzungai eta ikusgai larunbateko kontzertuan. Aipagarriena agian, Amaia Operaren Ezpatadantzakoa. Izan ere, txistulari, metal boskote, dantzari eta txalapartariez gain, Lurdes eta Jasone trontzan aritu ziren. Bi neska hauek sasoi ederrean daudela erakutsi ziguten bertan geunden guztioi, izan ere, ezpatadantzako erritmoan aritu ziren trontzan. Ikusgarria eta soinu efektu ederra ezpadantzari jarritakoa. Bejondeizuela neskak!  

Jarraian Idiazabaldik helarazi dizkiguten hainbat argazki. Bertan ikusgai kontzertuko zenbait une.

Zelaa kiroldegia jendez gainezka Txistu Alardea entzuten

Xabier Barriola eta Inma Albisuak Benito Lertxundiren Erribera eta Udazken koloreak kantuak  abestu zituzten

Amaia Operako Ezpatadantzaren une bat

Naxario Telleria Gernika pieza zuzentzen

Idiazabalera gerturatu ginen Urretxuko txistulariak